Skip to content

Eruvin · 24b

Text display

Font size: 19px

Go to a reference
Same place in another edition

Anchor: BT.Eruvin.24b.1

Tap a number or a passage to select it.

Mo'ed

אמר אמימר והוא דחזיין לתשמישתא אבל לא חזיין לתשמישתא לא
אמר רב אשי ודחזיין לתשמישתא נמי לא אמרן אלא שאין בעומקו יותר מבית סאתים אבל אם יש בעומקו יותר מבית סאתים אסור
ולאו מילתא היא מידי דהוה אכריא דפירי
ההיא רחבה דהואי בפום נהרא דחד גיסא הוה פתיח למתא וחד גיסא הוה פתיח לשביל של כרמים ושביל של כרמים הוה סליק לגודא דנהרא
אמר אביי היכי נעביד לעביד ליה מחיצה אגודא דנהרא אין עושין מחיצה על גבי מחיצה
ולעביד ליה צורת הפתח אפומא דשביל של כרמים אתו גמלי שדיין ליה
אלא אמר אביי ליעביד לחי אפיתחא דשביל של כרמים דמגו דמהניא לשביל של כרמים מהני נמי לרחבה
אמר ליה רבא יאמרו לחי מועיל לשביל של כרמים דעלמא
אלא אמר רבא עבדינן ליה לחי לפיתחא דמתא דמגו דמהני ליה לחי למתא מהני נמי לרחבה
הלכך טלטולי במתא גופה שרי טלטולי ברחבה גופה שרי ממתא לרחבה ומרחבה למתא פליגי בה רב אחא ורבינא חד אסר וחד שרי

Source and terms: Babylonian Talmud (37 tractates), text of the Vilna edition (Hebrew Wikisource) · CC BY-SA 4.0 · Talmud Bavli, Vilna edition, text from Hebrew Wikisource (he.wikisource.org, תלמוד בבלי), via Sefaria-Export (licence field 'CC-BY-SA'). · terms · source

Bookmarks, notes and the reading position are stored only in this browser.